Направете самопреглед на кожата еднаш месечно со помош на огледало:
Вашата контрола треба да го опфати целото тело, напред и назад, со посебено внимание на областите изложени на сонце.
Прегледајте го лицето, вклучувајќи го и носот, усните, усната шуплина и ушите.
Прегледајте го скалпот, користете чешел за да ја делите косата на слоеви. Ако немате многу коса, не заборавајте да го прегледате целиот скалп многу темелно.
Прегледајте ги дланките од предната и задната страна, помеѓу прстите и ноктите.
Потоа фокусирајте се на вратот, стомакот и градите (жените треба добро да го прегледаат делот под дојките).
Подигнете ја раката за да ја проверите надлактицата и пазувите.
Со помош на мало огледало во големо огледало прегледајте ги тилот, рамењата, грбот и задниот дел на бедрата.
Проверете ги задникот и задниот дел од нозете. Завршете со проверка на стапалата.
СОМНИТЕЛНИ ЛЕЗИИ НА КОЖАТА
Има 4 главни видови сомнителни лезии на кожата
Melanoma
Ова е најретката форма на рак на кожата, но исто така и најопасна. Може да се појави кај луѓето во било која возраст, за разлика од другите видови кои се почести кај постарите лица. Се појавува како дамка која станува темно пигментирана или се развива со неправилни рабови или различно се пребојува со текот на времето, или пак е розова или црвена грутка. Може да се шири внатрешно, така што е неопходен итен третман.
Basal cell carcinoma
Ова е најчестата форма на рак на кожата, но исто така и најмалку опасна. Обично се појавува како елевација со сјаен раб сличен на бисер, рана што не заздравува или груба грутка која со текот на времето полека расте. Доколку не се лекува, може да улцерира и да ги нападне подлабоките ткива.
Squamous cell carcinoma
Ова е втората најчеста форма на рак на кожата, која се јавува на деловите кои се најмногу изложени на сонце, како што се лицето и скалпот. Таа претставува сунѓереста грутка која може брзо да расте, да улцерира и да влажи. Може брзо да се шири, особено ако е на усните, ушите, на прстите на рацете и нозете, или кај лица со намален имунитет.
Хируршки третман за отстранување на лезиите е од суштинско значење.
Actinic keratosis
Ова се случува најчесто кај средовечни и стари лица, на областите кои се најмногу изложени на сонце како што се лицето, вратот, ушите, задниот дел од рацете и скалпот. Се појавува како црвено-кафена сува и груба бемка на кожата. Лезиите се пред-канцерозни; 10-15% од случаите може да се развијат во сквамозен клеточен карцином, затоа треба да се третираат за да се спречи прогресија.
Подготвил:
Сектор за промоција, анализа и следење на незаразни болести
