Колку порано започнете да се грижите за оралното здравје на вашето дете толку поздрава и поубава насмевка ќе има кога ќе порасне.

 
oralno 1

 

Добра орална нега за вашето дете веднаш по  раѓањето 

Одржувањето на оралното здравје кај детето треба да започне веднаш по раѓањето. Усната празнина кај новороденчето треба да ја бришете со влажна газа, особено после секое хранење и пред спиење и иако понекогаш може да изгледа невозможно, да избегнувате  вашето бебе да го оставате да  спие со шише за хранење во устата. Со појавата на првиот заб, а тој се појавува по шестиот месец од животот на бебето, започнете да го бришете со влажна газа двапати на ден, затоа што првите заби, млечната дентиција, игра важна улога при зачувување на просторот за трајните заби.

 

Надгледувајте го вашето дете додека ги четка забите

Четкањето на забите на вистински начин е важно за оралното здравје и треба да биде обврска на родителот,  се додека детето не се научи само да ги мие запчињата.

Кога кај малото дете ќе изникнат повеќе запчиња, тогаш е време за четкање со мека четка. Четкањето на забите може да го започнете со обична вода и полека да воведувате паста со флуор. Големата количина на паста може да создаде многу пена и детето да ја проголта. Четкањето на забите треба да трае  две минути, а движењата со четката да се кружни – не напред и назад,. двапати на ден – после појадок и пред спиење – што ќе  помогне да се намали ризикот од расипување на забите и заболување на непцата.

На крај содржината од устата треба да се исплука, но не и да се исплакнува јако со вода, затоа што постои опасност од измивање на заштитниот флуор.

Просечен век на траење на четката за заби  е околу 3 месеци. Старата и истрошена четка нема да ги исчисти забите правилно.

         oralno 2

 

Не дозволувајте  било какво јадење  на  вашето дете пред спиење

По четкање на забите пред спиење не дозволувајте  било какво  јадење  на  вашето дете. Одењето во кревет со чиста уста е многу важно,  затоа што  бактериите кои остануваат од храната  се лепат на забите и остануваат  цела ноќ,  што може да предизвика појава на кариес, односно  расипување на забите.

 

Закажете состанок на стоматолог за вашето дете

Ако во минатото првата посета на стоматолог се препорачуваше по третата година, сега веќе не е така, затоа што најчесто на таа возраст штетата е веќе направена, односно, запчињата се веќе расипани или почнале да се расипуваат.

Затоа закажете ја првата посета на стоматолог веднаш по никнувањето на првото запче или најдоцна кога ќе дојде првиот роден ден.

Редовните посети на стоматолог го продолжуваат животот на млечните заби кај вашето дете. Тие можат да  бидат само превентивни прегледи и интервенции кои треба да го спречат расипувањето на млечните детски заби.

При тоа, на вашето малечко треба внимателно да му објасните каков ќе биде прегледот кај стоматологот, како нешто забавно каде што ќе добиете слика од неговите заби, како знак дека тоа пораснало, со што тоа подобро ќе ја разбере посетата и на тој начин треба да се победи стравот од стоматологот.

 oralno 3

 

Превенцијата, раното откривање и третманот е важен во одржувањето на оралното здравје на  вашето дете

Исто како и кај другите болести, превенцијата, раното откривање и третманот е важен во одржувањето на оралното здравје на  вашето дете, а со тоа и на целокупнoто здравје и благосостојба.

Одвојте го вашето дете од  цуцла

Цицање на цуцла или палец предолго време предизвикува неправилен развој на забите и устата на вашето дете. Не дозволувајте цицање на палецот и долготрајна употреба на цуцла. Никогаш не ставајте шеќер или мед на  цуцлата и во шишиња за хранење ставете само млеко или вода. Воздржете се од додавање шеќер во млекото или ставање во  шишињата шеќерни пијалоци како што се засладени  овошни сокови. Најдобро е, ако можете да го охрабрите вашето дете да пие од чаша што е можно порано.

 oralno 4

Намалете го шеќерот во исхраната заменувајќи го со други  вкусни алтернативи

Храната богата со шеќери и засладените  пијалоци се причина број еден за расипување на забите и појава на други орални заболувања, и лошо влијаат на севкупното здравје не само кај децата туку и кај возрасните.

Обидете се да го ограничите  внесувањето на шеќери кај вашето дете и  започнете со здрава исхрана, со малку шеќер и многу овошје и зеленчук. Тоа би значело дневната доза на шеќер да изнесува приближно 6 лажички кај возрасни и 3 лажички кај деца, за да се минимизира ризикот од кариес во текот на животот.

ЗАТОА:

  • Не го оставајте вашието дете  само  да ги четка забите додека не сте сигурни дека правилно го прави тоа!
  • Не го оставајте вашето дете да спие со шише во устата!
  • Закажете ја првата посета на стоматолог веднаш по никнувањето на првото запче или најдоцна кога ќе дојде првиот роденден.
  • Ограничете го внесот на шеќери  кај вашето дете и  започнете со здрава исхрана, со малку шеќер и многу овошје и зеленчук.!
  • Не дозволувајте вашето дете да добие кариес или друго орално заболување!

Само редовното четкање на забите, здравата исхрана и редовните посети на стоматолог можат да го зачуваат доброто орално здравје на вашето дете.

 

Подготвил: Оддел за здравствена промоција и следење на болести