Во Одделението за испитување квалитет на храна се изведуваат хемиски и физичко-хемиски испитувања на храна како безалкохолни и алкохолни пијалаци, чоколади и кондиторски производи, брашно и мелнички производи, овошје и зеленчук и нивни производи, млеко и млечни производи, месо и месни преработки, масти и масла од растително и животинско потекло, суровини и адитиви во прехранбена индустрија, мед и пчелни производи, зачини, ароми и концентрати за освежителни пијалаци, храна за доенчиња, храна за животни, диететски суплементи, итн.

Тестирањето на параметрите на квалитет на прехранбените производи се прави по стандардни и пропишани методи според важечките национални и ЕУ законски прописи. Во одделението во моментот се акредитирани вкупно 33 методи со визија за проширување на овој опсег зависно од потребите и барањата на законските прописи и корисниците на услуги. Аналитичките испитувања се базираат на хроматографски (HPLC, GC), спектрофотометриски, ELISA, волуметриски, гравиметриски методи, итн.

Во примероците за испитување се анализираат следните параметри: содржина на вода, сува материја, пепел, протеини, масти, состав на масни киселини, шеќери, диететски влакна, содржина на органски киселини, алкохол, вкупен екстракт, релативна густина, сапунификационен број, јоден број, киселински степен, содржина на фосфати и содржина на колаген во месо и месни преработки, содржина на нитрати во зеленчук и преработки, присуство на алерген глутен во безглутенски производи, присуство на трагови од млеко во храна, итн. Освен тоа, во прехранбените производи се испитува и присуството на различни адитиви како: конзерванси (бензоати, сорбати), засладувачи (ацесулфам, аспартам, сахарин), вештачки прехранбени бои, судан бои. Во додатоците на храна се определува содржината на витамини (хидро и липосолубилни), присуството на некои активни компоненти како: коензим Q10, хесперидин, диосмин, изофлавони, кверцетин, гинсенозиди, хининска киселина, глукозамин, хондроитин итн. Во препарати за слабеење се анализира присуство на недозволени фармаколошки активни супстанции од типот на сибутрамин.

Дел од активностите на одделението се насочени и кон определување на нутритивната вредност на прехранбените производи врз основа на добиените аналитички податоци од испитаните хемиски параметри. Високо стручниот кадар во одделението може да понуди совети околу категоризација на производите, изработка на декларација на производ и усогласување на декларацијата со законските прописи поврзано со состојките, нивните количини, употребата на здравствени и нутритивни тврдења, итн.

Персоналот во Одделението за испитување квалитет на храна го сочинува кадар кој е стручно и технички оспособен за работа во согласност со меѓународно прифатени критериуми и континуирано соработува со домашни и меѓународни лаборатории што е во насока на унапредување на работата. Исто така, одделението има успешна соработка со  бројни институции во земјата и странство и е вклучено во реализација на бројни научно-истражувачки проекти, годишните мониторинг програми на Агенцијата за храна и ветеринарство и Министерството за здравство.

Одделението за испитување квалитет на храна е акредитирано согласно ISO 17025 стандардот од 2006 год., а списокот на акредитирани методи може да се најде на нашата веб страница како и на страницата на Институтот за акредитација на РСМ. Лабораторијата редовно учествува во шеми за оценка на оспособеност што е во насока на општо препознавање на резултатите од тестирањето.