Вчера во просториите на Институтот за јавно здравје се одржа конструктивна работна средба помеѓу министерот за здравство, Азир Алиу, директорката на ИЈЗ, Марија Андоновска, како и раководителите на оддели и вработените. На средбата беа презентирани отчет за работењето на ИЈЗ последната година, тековните активности на Институтот, проектите во реализација и идните планови за развој и модернизација.

 

Министерот Алиу ја нагласи стратешката улога на Институтот за јавно здравје како столб на јавноздравствениот систем и истакна дека Министерството ќе се фокусира на дигитализација и систематизирање на податоците, со цел нивно претворање во конкретни акциски планови. Тој додаде дека благодарение на одговорното менаџирање и посветената работа на раководството, Институтот денес функционира на повисоко ниво и иницира нови процеси за унапредување на работењето. Министерот Алиу даде сопствено видување, насоки и предлози за унапредување на функционирањето на ИЈЗ , како и на целиот здравствен систем, останувајќи посветен на процесите.

 

Директорката Андоновска даде детален преглед на резултатите и реализираните активности во изминатиот период, меѓу кои и воведувањето втора смена во микробиолошката лабораторија, што го прави ИЈЗ единствена лабораторија во државата која нуди услуги и по завршување на стандардното работно време.

 

„Реализиравме бројни проекти кои директно ги подобруваат услугите за граѓаните – ставивме во функција опрема која со години стоеше неискористена, воспоставивме две телефонски линии за директна комуникација со граѓаните, изработивме промотивни материјали адаптирани со Брајова азбука, обезбедивме континуирана едукација за вработените и подобри услови за работа и прием на пациенти“, истакна директорката Андоновска.

 

Институтот за јавно здравје продолжува со реализација на амбициозен развоен план, насочен кон подигнување на квалитетот и достапноста на јавноздравствените услуги и понатамошно јакнење на институционалните капацитети.