На 09.02.2026 година, во Институтот за јавно здравје на Република С. Македонија се одржа работна средба со претставници на Регионалниот центар за надзор и контрола на заразни болести за Југоисточна Европа (SECID), со седиште во Тирана, Албанија.

Делегацијата на SECID беше предводена од проф. д-р Силвиа Бино, раководител на Одделот за контрола на заразни болести при Институтот за јавно здравје на Албанија и г-ѓа Ледиа Аголи, извршен директор на SECID.

На средбата присуствуваше директорката на Институтот за јавно здравје на Република С. Македонија, науч. сор. д-р Марија Андоновска и претставници од Одделот за епидемиологија на заразните заболувања.

Целта на средбата беше унапредување и продолжување на повеќегодишната соработка меѓу двете институции, особено во областа на надзор, превенција и контрола на заразни болести, јакнење на институционалните капацитети, како и развој и имплементација на заеднички активности и регионални иницијативи во рамките на надлежностите и мандатот на SECID.

На средбата беше изразена заедничка подготвеност за натамошно унапредување на соработката и координирано делување во насока на зајакнување на јавно-здравствениот систем и поефикасно справување со регионалните и прекуграничните здравствени закани.