Dita Botërore Kundër Punës së Fëmijëve shënohet çdo vit më 12 qershor si një ditë për ta rritur ndërgjegjësimin dhe për të ndërmarrë veprime të shpejta për ta ndaluar punën e fëmijëve në të gjitha format e saj.

E themeluar në vitin 1919 si pjesë e Traktatit të Versajës, i cili i dha fund Luftës së Parë Botërore, Organizata Ndërkombëtare e Punës (ILO) u themelua mbi besimin se paqja e qëndrueshme është e mundur vetëm nëse bazohet në drejtësinë sociale. Si rezultat i kësaj, në vitin 2002 u themelua Dita Botërore Kundër Punës së Fëmijëve.

Puna e fëmijëve mund të përkufizohet si "punë që i privon fëmijët nga fëmijëria, potenciali dhe dinjiteti i tyre dhe që është e dëmshme për zhvillimin e tyre fizik dhe mendor". Prandaj, jo e gjithë puna e bërë nga fëmijët është abuzim me punën e fëmijëve. Aktivitetet që kontribuojnë në zhvillimin pozitiv të fëmijës dhe mundësojnë aftësi dhe përvojë për t'u bërë anëtarë produktivë të shoqërisë nuk janë abuzim me punën e fëmijëve. Puna e fëmijëve e ndaluar sipas ligjit ndërkombëtar ndahet në tre kategori:

Ø  Format më të këqija të punës së fëmijëve, të cilat përkufizohen ndërkombëtarisht si skllavëri, trafikim, skllavëri e borxhit dhe forma të tjera të punës së detyruar, rekrutim i detyruar i fëmijëve për përdorim në konflikte të armatosura, prostitucion dhe pornografi dhe aktivitete të paligjshme

Ø  Puna e kryer nga një fëmijë që është nën moshën minimale të caktuar për atë lloj pune (siç është definuar me legjislacionin kombëtar, në përputhje me standardet e pranuara ndërkombëtare), e që mund të pengojë arsimimin dhe zhvillimin e plotë të fëmijës

Ø  Puna që rrezikon mirëqenien fizike, mendore ose morale të fëmijës, për shkak të natyrës së saj ose për shkak të kushteve në të cilat kryhet, e njohur si "punë e rrezikshme".

Puna e fëmijëve është një problem me të cilin përballen miliona fëmijë në mbarë botën. Pavarësisht normave dhe legjislacionit ndërkombëtar që ndalon punën e fëmijëve, ajo vazhdon të keqpërdoret.

Rreth 160 milionë fëmijë në mbarë botën - gati 1 në 10 fëmijë janë të ekspozuar ndaj punës së fëmijëve, të angazhuar në punë që i privojnë ata nga arsimi, kërcënojnë mirëqenien e tyre dhe shkelin të drejtat e tyre themelore. Kombet e Bashkuara vlerësojnë se rreth 75 milionë viktima të punës së fëmijëve janë në moshë nga 5 deri në 11 vjet. Dyzet e dy milionë fëmijë (28%) janë në moshë nga 12-14 vjet; 37 milionë (24%) janë në moshë nga 15-17 vjet.

§  Nga këto fëmijë, 63 milionë janë vajza dhe 97 milionë janë djem.

§  Afrika Sub-Sahariane ka numrin më të madh të fëmijëve që punojnë - 86.6 milionë fëmijë, e ndjekur nga Azia Qendrore dhe Jugore me 26.3 milionë.

§  1 në 3 fëmijë që punojnë nuk janë pjesë e procesit arsimor.

§  Rreth 70% (112 milionë) e fëmijëve që punojnë, punojnë në bujqësi dhe blegtori.

§  20% e viktimave të trafikimit të qenieve njerëzore, brenda një vendi, janë fëmijë.

Rrënjët e punës së fëmijëve janë komplekse dhe të shumëanshme, që shpesh burojnë nga një ndërthurje e faktorëve socio-ekonomikë. Varfëria ekstreme dhe papunësia e prindërve janë faktorët që I ekspozojnë më së shumti fëmijët, mungesa e qasjes në arsim dhe qëndrimet sociale që e normalizojnë punën e fëmijëve kontribuojnë në vazhdimësinë e saj, sidomos në vendet në zhvillim. Në këtë drejtim, nevojitet një përpjekje e përbashkët për ta çrrënjosur varfërinë dhe për t’i korrigjuar çrregullimet e sistemit aktual ekonomik, i cili e përqendron pasurinë në duart e të paktëve. Gjithashtu duhet t’i mbështesim organizatat e shoqërisë civile për t'u bërë presion shteteve dhe aktorëve ekonomikë për të krijuar mundësi të denjë pune me paga të drejta që do t'u mundësojnë familjeve të plotësojnë nevojat e tyre pa i detyruar fëmijët e tyre të punojnë.

Gjithashtu, duhet rritur ndërgjegjësimi, mbështetja dhe inkurajimi i familjeve të varfra për t'i dërguar fëmijët e tyre në shkollë, duhet dekurajuar punësimi i tyre në shtëpi dhe fabrika, si dhe duhen mbështetur organizatat dhe fondacionet joqeveritare që punojnë për të mirën e fëmijëve dhe të rinjve në vendet në zhvillim, sepse, mungesa e arsimit në vetvete inkurajon mundësi më të madhe të shfrytëzimit, trafikimit të qenieve njerëzore (veçanërisht të fëmijëve).

 Trafikimi i fëmijëve dhe puna e detyruar përbëjnë shkelje ekstreme të të drejtave të fëmijëve, që përfshin rekrutimin, transportin dhe shfrytëzimin për qëllime të ndryshme, shfrytëzimin seksual komercial, punën e detyruar dhe lypjen e detyruar. Këto praktika u shkaktojnë viktimave dëmtime të rënda psikologjike dhe fizike, dhe i fusin ato në një kurth të cikleve të shfrytëzimit dhe abuzimit.

Këto janë vetëm disa shembuj që flasin për realitetin e tmerrshëm të punës së fëmijëve. Por ne nuk mund ta pranojmë këtë si normë

Çfarë mund të bësh?

ü  Përkujdesje për fëmijët që jetojnë në rrethana të dhunshme.

ü  Burime ligjore për gjetjen e fëmijëve të zhdukur.

ü  Këshillim për fëmijët që janë të traumatizuar.

ü  Kujdes mjekësor dhe mbështetje e vazhdueshme për viktimat e abuzimit.

ü  Ndërhyrje për adoleshentët që luftojnë me alkoolin, aktivitetin seksual ose mungesën e tij.

ü  Këshillim për të fuqizuar prindërit për t’i mbrojtur dhe siguruar fëmijët e tyre.

ü  Trajnim për punë dhe mundësi të ardhurash për prindërit në mënyrë që fëmijët të mund të vazhdojnë të ndjekin mësimin.

E pikërisht kjo është arsyeja se pse Dita Ndërkombëtare Kundër Punës së Fëmijëve na kujton përgjegjësinë tonë për të folur për të drejtat e fëmijëve dhe për të punuar për mbrojtjen e tyre.