Konsumimi i tepërt i kripës është një faktor i rëndësishëm rreziku për tensionin e lartë të gjakut, sëmundjet cerebrovaskulare dhe të veshkave. Organizata Botërore e Shëndetësisë rekomandon që konsumi ditor i kripës për popullatën e rritur të jetë më pak se 5 gramë.

Sipas vlerësimeve të Institutit të Shëndetit Publik, popullsia në Maqedoni konsumon mesatarisht rreth 11 g. kripë në ditë, që është më shumë se dyfishi i sasisë së rekomanduar ditore.

Përveç kësaj, analiza e 221 produkteve ushqimore nxorri në pah se përmbajtja e natriumit në shumicën e produkteve i tejkalon vlerat e rekomanduara të Organizatës Botërore të Shëndetësisë.

Përmbajtje më e lartë e kripës u konstatua tek:

• instant supat dhe makaronat;

• mishi i përpunuar dhe produktet e konservuara të mishit;

• ushqimet e njelmëta;

• produktet e qumështit;

• buka dhe produktet me drithëra.

Pjesa më e madhe e kripës së konsumuar vjen nga ushqime shumë të përpunuara, prandaj është veçanërisht e rëndësishme që konsumatorët t’i lexojnë me kujdes etiketat dhe të zgjedhin produkte me përmbajtje më të ulët të kripës.

Instituti i Shëndetit Publik rekomandon:

• kufizimin e ushqimeve shumë të përpunuara;

• uljen graduale të përdorimit të kripës gjatë përgatitjes së ushqimit;

• shmangien e kripës shtesë;

• përdorimin e bimëve dhe erëzave natyrale si alternativë për kripën;

• zgjedhjen e produkteve me përmbajtje më të ulët të kripës.

Ulja e konsumit të kripës është një nga masat më efektive dhe me ekonomike për përmirësimin e shëndetit publik dhe për zvogëlimin e rrezikut nga sëmundjet kronike joinfektive.